Әйелдер істері жөніндегі Ұлттық комиссия СҚО-да жұмыс жүргізуде: Репродуктивті денсаулық басты назарда
Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшелері Солтүстік Қазақстан облысына жұмыс сапарымен келді. Бұл сапар отбасы және гендерлік саясатты іске асыру тәжірибесімен бөлісуді мақсат етеді.
Делегация Петропавл қаласындағы бірқатар әлеуметтік және медициналық мекемелерді аралады.
Ерте жүктіліктің алдын алуға басымдық
Комиссия мүшелерінің назары ерекше қалалық №1 емханасына аударылды. Негізгі басымдық – жасөспірімдер мен жастардың репродуктивті денсаулығын сақтау және кәмелетке толмағандар арасындағы ерте жүктіліктің алдын алу мәселелеріне берілді.
Бұл бағытта «Күштерімізді біріктіріп — жасөспірімдер мен жастардың репродуктивті денсаулығын сақтаймыз» тақырыбында арнайы семинар ұйымдастырылды. Семинарға орталық және жергілікті мемлекеттік органдар, үкіметтік емес ұйымдар, облыс әкімдігінің аймақтық комиссия мүшелері, сондай-ақ денсаулық сақтау және білім беру саласының мамандары қатысты.
Қатысушылар жас ұрпақтың репродуктивті денсаулығын қорғау мәселелеріндегі өзекті проблемалар мен ведомствоаралық ынтымақтастықтың болашағын талқылады.
Жұмыс сапарының мақсаты – ана мен баланы қолдауға бағытталған бастамаларды дамыту және өзара ынтымақтастықты нығайту.
